Градоначалникот на Град Скопје, Орце Ѓорѓиевски, денеска престојува во Брисел, каде што учествува на седницата на Заедничкиот консултативен комитет при Европскиот комитет на регионите, форум посветен на соработката меѓу македонските општини и локалните власти од земјите членки на Европската Унија.
На настанот присуствуваат претставници на локалната и регионалната власт од земјите на ЕУ, како и од државите кандидати за членство, а Ѓорѓиевски најави и свое обраќање пред учесниците.
Според него, седницата претставува важна можност за размена на искуства, продлабочување на соработката меѓу општините и отворање дискусии за предизвиците поврзани со процесот на европска интеграција.
„Интеграцијата во Европската Унија останува стратешки приоритет на Македонија, а општините имаат клучна улога и во евроинтеграцискиот процес и во спроведувањето на реформите. Тие се директни партнери во приближувањето на локалните стандарди кон европските и во исполнувањето на агендата за интеграција“, истакна Ѓорѓиевски.
Тој посочи дека фокусот на дискусиите е ставен на продолжувањето на реформските процеси, патот кон членство во Европската Унија и зајакнувањето на улогата на локалната самоуправа како значаен фактор во приближувањето на државата кон европското семејство.
