Македонската тенисерка Лина Ѓорческа го оствари најголемиот успех во својата кариера, откако денеска избори пласман во главниот жреб на Вимблдон 2026.
Триесет и едногодишната тетовчанка во третото квалификациско коло ја совлада Италијанката Лучија Бронцети со 2:0 во сетови и на тој начин испиша историја, станувајќи првата македонска тенисерка која ќе настапи на најпрестижниот тревен Гренд слем-турнир.
Ѓорческа, која во квалификациите настапи како една од пониско рангираните тенисерки, покажа одлична форма и голема ментална сила на тревната подлога.
По победата во првото коло над Анхела Фита Болуда со 6:2 и 6:4, македонската тенисерка во второто коло направи пресврт против Франциска Жорге, славејќи со 5:7, 6:2 и 6:1.
Во решавачкиот меч за пласман во главниот жреб, Ѓорческа беше подобра од искусната Лучија Бронцети, која беше 20. носителка во квалификациите и се наоѓа меѓу најдобрите 130 тенисерки на ВТА-листата.
Со овој триумф, Ѓорческа го надмина досегашниот најголем успех во македонскиот женски тенис и обезбеди историски настап на Вимблдон.
Главниот жреб за Вимблдон 2026 ќе биде извлечен во петок, кога македонската тенисерка ќе ја дознае и својата прва противничка.
Без оглед на резултатот во првото коло, успехот на Лина Ѓорческа веќе е запишан со златни букви во историјата на македонскиот спорт.
