Успехот на македонската тенисерка Лина Ѓорческа, која стана првата Македонка што настапила на Вимблдон, е пред сè нејзин личен успех, оценува Влатко Васиљ во објава на социјалните мрежи.
Според него, иако денес јавноста масовно го поздравува овој историски резултат, институциите, спонзорите и пошироката заедница изостанале во изминатите години кога на Ѓорческа најмногу ѝ била потребна поддршка.
„Ова што денес го славиме како национален успех, реално е нејзин личен успех. Само нејзин“, пишува Васиљ, нагласувајќи дека тенисерката до Вимблдон стигнала со сопствен труд, финансиски средства, упорност и бројни жртви.
Тој посочува дека приказната на Ѓорческа е само уште еден пример за недостигот од системска поддршка за младите спортски таленти во Македонија.
Во својата објава, Васиљ наведува дека многу млади спортисти секојдневно се соочуваат со бројни пречки на патот до успехот и дека државата сè уште нема доволно развиен систем за навремено препознавање и поддршка на талентите.
„Ова е твој личен успех, а наша национална грешка што се сетивме да те славиме дури кога светот те препозна“, порачува Васиљ, обраќајќи ѝ се на Ѓорческа.
