Макрон: Европа за 10 години треба да има сопствени мисии со астронаути

Европа треба да развие сопствен капацитет за испраќање астронаути во вселената во следните десет години, порача францускиот претседател Емануел Макрон на меѓународниот самит за вселената што се одржува во Париз.

Макрон истакна дека Европа мора да ја зајакне својата независност во вселенскиот сектор и да ги зголеми инвестициите во развојот на сопствени технологии и капацитети.

— реклама —

„Сакаме Европа да ја потврди својата амбиција во областа на летовите со астронаути. Нашата европска вселенска програма и понатаму е ранлива и мора да ги засилиме нашите напори“, порача францускиот претседател.

Генералниот директор на Европската вселенска агенција, Јозеф Ашбахер, претходно побара поголеми средства за развој на независен европски вселенски сектор. Тој предупреди дека Европа мора да одлучи дали во иднина ќе биде „патник или пилот“ во вселената.

— реклама —

Европа досега нема испратено сопствена мисија со астронаути, туку се потпираше на ракетите и вселенските капсули на Русија и САД.

Макрон претстави и конкретни цели за следната деценија. Според неговиот план, за две години Европа треба да ја испрати првата товарна капсула „Никс“ до Меѓународната вселенска станица, а за пет години лунарниот лендер „Аргонаут“ треба да слета на Месечината.

— реклама —

„А за десет години, првата европска капсула со екипаж да полета од Куру со европски астронаути и астронаути од други земји на бродот“, рече Макрон, мислејќи на европскиот космодром во Француска Гвајана.

За реализација на овие амбиции ќе бидат потребни значителни финансиски средства. Ашбахер проценува дека Европа ќе треба да вложува околу една милијарда евра годишно во следните десет години.

— реклама —

Тој предупреди дека продолжувањето на зависноста од странски партнери исто така има висока цена. Според неговите проценки, купувањето летови за европските астронаути од странски компании би чинело околу пет милијарди евра во период од десет години.

Земјите членки на Европската вселенска агенција во декември треба да одржат министерски состанок на кој ќе се разгледуваат следните чекори. Минатата година, агенцијата обезбеди рекорден буџет од 22,1 милијарда евра за своите програми во наредните три години.