Францускиот претседател Емануел Макрон изјави дека Франција и Европа во последните недели се соочуваат со засилени руски хибридни закани.
По состанокот со лидерите на парламентарните партии, Макрон оцени дека се зголемила заканата со која се соочуваат Франција и Европа, особено кога станува збор за активности што ги поврзува со Русија.
„Во последните недели се засили заканата со која се соочуваат Европа и Франција, а тоа особено се однесува на руските хибридни закани“, изјави Макрон.
Францускиот претседател смета и дека се менува природата на руската агресија. Како примери за новото ниво на закани ги посочи нападот врз воз што сообраќа меѓу Полска и Украина, навлегувањето на беспилотни летала во воздушниот простор на соседните земји, како и спречениот напад врз аеродромот во Лајпциг.
Германија претходно ја обвини Русија за обид за напад со беспилотно летало врз аеродромот во Лајпциг, што се случил во август.
Во меѓувреме, минатиот викенд се случил и безбедносен инцидент во Украина, кога руски дрон погодил воз што се движел непосредно зад колоната во која патувал поранешниот британски премиер Борис Џонсон.
