Францускиот претседател Емануел Макрон и германскиот канцелар Фридрих Мерц покренаа иницијатива за нов голем договор меѓу Париз и Берлин, чија цел е зајакнување на европската индустрија и поддршка на автомобилскиот сектор.
По средбите одржани минатата седмица во Германија, владите на двете земји добија задача да изготват сеопфатен договор што би ги усогласил француските барања за поголема заштита на европскиот пазар со германските напори за ублажување на кризата во автомобилската индустрија.
Според „Политико“, Берлин би можел да ги поддржи построгите правила „Произведено во Европа“ во рамките на европскиот Закон за индустриско забрзување, со што би се ограничил бројот на земји што можат да добијат статус на доверлив трговски партнер и пристап до јавни набавки и субвенции.
За возврат, Франција би прифатила поголема флексибилност околу планираната забрана за продажба на нови автомобили со мотори на внатрешно согорување од 2035 година, што е едно од клучните барања на Германија и нејзината автомобилска индустрија.
Францускиот министер за индустрија Себастијен Мартен изјави дека целта е договорот да биде постигнат наесен и оцени дека тој би можел да добие поддршка и од други земји, како што е Италија.
Преговорите ќе продолжат во текот на летото, со амбиција договорот да биде подготвен пред состанокот на министрите за индустрија на ЕУ во септември и самитот на лидерите на Унијата во октомври.
Разговорите се одвиваат паралелно со преговорите меѓу Европската Унија и Кина за намалување на трговскиот дефицит, како и со расправите за новиот Закон за индустриско забрзување, кој Европската комисија сака да биде усвоен до крајот на годината.
Покрај индустриските политики, договорот се подготвува и во период на политичка неизвесност во Франција, каде што следната година се одржуваат претседателски избори. Аналитичарите оценуваат дека евентуална победа на крајната десница би можела значително да ја усложни идната француско-германска соработка во рамките на Европската Унија.
