Макрон ја потврди француската поддршка за Албанија на патот кон ЕУ

Албанскиот премиер Еди Рама денеска престојуваше во официјална посета на Париз, каде што во Елисејската палата оствари работна средба и ручек со францускиот претседател Емануел Макрон.

— реклама —

Посетата се реализира во рамки на политичкиот дијалог на високо ниво меѓу Албанија и Франција, со цел понатамошно зајакнување на стратешкото партнерство меѓу двете земји, како и размена на ставови за европската интеграција на Албанија и претстојниот самит на НАТО во Анкара.

— реклама —

Според албанската државна агенција за медиуми и информирање, Албанија ја цени улогата на Франција и личната посветеност на претседателот Макрон во промовирањето на нов пристап кон Западен Балкан и поддршката на европската перспектива на регионот.

По средбата, Макрон преку објава на платформата Икс ги пофали односите меѓу двете земји, нагласувајќи ја соработката во областа на иновациите, образованието, културата и туризмот.

— реклама —

„Сакаме да дадеме нов импулс на ова партнерство, дополнително зајакнувајќи ја економската и одбранбената соработка. Франција ја потврдува својата поддршка за европската интеграција на Албанија и за продолжување на неопходните реформи на патот кон Европската Унија“, напиша Макрон.

Денешната средба е продолжение на интензивната комуникација меѓу двајцата лидери, кои претходно официјално се сретнаа во Париз во април 2024 година, како и во Тирана во октомври 2023 и мај 2025 година. Покрај билатералните средби, Рама и Макрон редовно се среќаваат и во рамки на различни меѓународни форуми и мултилатерални формати.