Макрон: Ќе ја засилиме поддршката за Украина по рускиот напад врз трговскиот центар

Францускиот претседател Емануел Макрон најави засилување на француската воена поддршка за Украина по смртоносниот руски напад врз трговски центар во Криви Рог, во кој загинаа 16 лица, а 130 беа повредени.

— реклама —

Макрон соопшти дека разговарал телефонски со украинскиот претседател Володимир Зеленски и го информирал дека Франција ќе ја зголеми поддршката, вклучително и преку испорака на ракети пресретнувачи и продолжување на соработката со Киев.

Зеленски го потврди разговорот, наведувајќи дека главна тема била потребата од зајакнување на украинската противвоздушна одбрана. Според него, двајцата лидери се договориле да се забрза испораката на најновата француска опрема и ракети.

— реклама —

Украинскиот претседател му се заблагодари на Макрон и за подготвеноста да се обезбедат лиценци за производство на ракети.

— реклама —

Во разговорот биле опфатени и дипломатските напори поврзани со војната, како и комуникацијата со тимот на американскиот претседател Доналд Трамп. Зеленски наведе дека биле договорени чекори што би можеле да отворат дополнителни дипломатски можности.

Во понеделник во Киев треба да се одржи состанок на таканаречената Коалиција на волни, на кој ќе се разговара за продолжување на поддршката за Украина. Домаќини на состанокот ќе бидат Макрон, германскиот канцелар и британскиот премиер, а дел од лидерите ќе учествуваат преку видеоврска.

Според „Ле Монд“, на состанокот лично се очекува да присуствуваат околу десетина лидери, меѓу кои и претседателот на Европскиот совет, Антонио Кошта.