Со серија обвинувања на адреса на Максим Димитриевски и партијата ЗНАМ, СДСМ денеска преку соопштение оцени дека политичкиот проект на актуелниот градоначалник на Куманово доживува распад, а неговите поддржувачи сè повеќе ја напуштаат партијата.
Од СДСМ тврдат дека ЗНАМ влегла во коалиција со ВМРО-ДПМНЕ поради, како што наведуваат, лични и бизнис интереси, а не поради политички принципи или програмски определби.
„Сите знаат зошто ЗНАМ влезе во тендер-коалицијата со организирана криминална група ВМРО. Тоа го знаат и граѓаните. Заради лични и бизнис интереси“, наведуваат од партијата.
Во соопштението се обвинува Димитриевски дека најпрво ја предал сопствената партија, а потоа и гласачите кои му дале поддршка.
Според СДСМ, ЗНАМ се соочува со внатрешни проблеми и заминување на членови, пратеници и советници, поради што, како што велат, Димитриевски останал сам да го брани политичкиот проект.
„Остана само Максо да го одработи авансот што го доби од Мицкоски“, се наведува во соопштението.
Од СДСМ понатаму тврдат дека ЗНАМ не е независна политичка партија, туку проект создаден за интересите на ВМРО-ДПМНЕ и за слабеење на опозицијата.
Во соопштението се отвора и прашањето за пријавата поврзана со тендерите во Пошта, при што од партијата бараат одговор од надлежните институции.
„Сега, кога партијата ви се распаѓа и граѓаните кои ви веруваа се измамени, останува само прашањето: кога ќе се огласи Обвинителството по пријавата за тендерите во Пошта?“, прашуваат од СДСМ.
