Остри критики кон раководството на Лекарската комора упати докторот Ненад Лазаров, кој преку јавна објава го постави прашањето зошто не се распишуваат избори иако, според него, мандатот на актуелното раководство е истечен.
Лазаров реагира дека состојбата во Комората трае предолго и со ироничен тон предлага промена на статутот со која актуелната претседателка Калина би била прогласена за доживотен претседател, заедно со делегатите.
„Мандатот е истечен, избори не се распишуваат, ако не, па да смениме во статут Калина да е доживотен претседател заедно со тоа делегатите?“, напиша Лазаров.
Тој најавува дека, како што вели, сите случаи на криминал ќе ги објави пред јавноста, со посебен акцент на периодот на пандемијата со ковид-19.
„Лично ви давам збор дека секој криминал, особено од ковидот, ќе ви биде изваден пред цела јавност!“, наведува докторот.
Лазаров истовремено ги повикува вработените во Лекарската комора кои, според неговите тврдења, имаат информации за наводни криминали, манипулации или други неправилности, да стапат во контакт со него.
„Додатно ги повикувам вработените внатре во Комора кои имаат информации за криминали, манипулации и сл., да ме контактираат, со задоволство јас ќе ги објавам“, порача тој.
Лазаров смета дека актуелната состојба во Комората мора да се промени и најавува дека, според него, на ваквиот начин на функционирање наскоро ќе му дојде крајот.
На крајот, докторот ги прозва и медиумите и новинарите, прашувајќи зошто состојбите во Лекарската комора не се тема во јавноста.
„И да ги прашам медиумите и новинарите, зошто ова не ви е тема?“, напиша Лазаров.
