„Наместо пари за шарлатани, однесете го детето во природа“, д-р Лазаров за алтернативните третмани за аутизам

Докторот Ненад Лазаров реагираше на критиките поврзани со неговите ставови за алтернативната медицина и таканаречените третмани за аутизам, посочувајќи дека неговото медицинско искуство и континуираната едукација не се доволна причина неговото мислење да се оспорува, додека во јавноста простор добиваат лица без медицинско образование.

Лазаров наведува дека има 15 години лекарски стаж, од кои 10 години во општа медицина и пет години како специјалист, како и бројни доедукации. Тој додава дека секојдневно следи нови медицински сознанија и работи со пациенти со тешки дијагнози.

— реклама —

„Јас со 15 години лекарски стаж, од кои 10 години општа медицина и 5 години специјалистички, милион и една доедукација, човек што секоја ноќ поминува по неколку часа да допрочита што е можно повеќе од новости и паралелно секојдневна борба за помош на луѓе со најтешки дијагнози, немам право на мислење за одредени делови од т.н. алтернативна медицина, конкретно за ‘лекување’ аутизам, зошто сум бил гинеколог“, наведува тој.

Според Лазаров, парадоксално е што истовремено како релевантни извори се претставуваат луѓе без медицинска едукација.

— реклама —

Тој отфрла и каква било поврзаност меѓу неговите ставови и фармацевтската индустрија, посочувајќи дека не продава ниту нуди лекови, ниту, како што вели, тврди дека постои друг ефикасен третман.

Лазаров им порачува на родителите да не издвојуваат средства за непроверени третмани, туку да ги насочат кон активности и услови што можат да имаат позитивно влијание врз детето.

— реклама —

„Наместо да давате пари на шарлатани, однесете го детето во природа со тие пари, на море или во планина, тоа сигурно ќе има полезно дејство. Купете со тие пари квалитетен пробиотик, квалитетна и здрава храна, исто така“, пишува Лазаров.

Во објавата тој се осврнува и на природата на медицината, нагласувајќи дека таа не функционира како математика или физика, туку се темели на искуства, биолошки процеси, клиничка практика, докази, веројатности и индивидуални разлики.

На крајот, Лазаров се осврнува и на критиките кон начинот на кој го води својот профил, посочувајќи дека не е политичар и дека нема обврска да им се допаѓа на сите или сите да се согласуваат со него.

„На мој профил ‘демократија’ има онолку колку што јас ќе дозволам, не сум политичар и немам потреба ниту да се допаднам некому ниту пак мора и треба за сè да се согласиме“, наведува Лазаров.