ВМРО-ДПМНЕ преку соопштение реагираше на изјавите на претседателот на СДСМ, Венко Филипче, оценувајќи дека неговиот мандат како министер за здравство бил обележан со пропуштени реформи, скандали и сериозни слабости во функционирањето на здравствениот систем.
Од партијата тврдат дека наместо подобрување на здравството, за време на неговото раководење биле отворени бројни прашања поврзани со набавката на вакцини преку посредник, како и со случајот што го нарекуваат „Крвави тендери“, поврзан со набавка на тестови и реагенси.
Во реакцијата се наведува дека во тој период се зголемиле листите на чекање, пациентите долго чекале за прегледи и интервенции, недостигот од медицински кадар се продлабочил, а јавните здравствени установи се соочувале со недостиг од опрема и основни услови за работа.
ВМРО-ДПМНЕ потсетува и на пожарот во модуларната болница во Тетово, во кој загинаа 14 лица, оценувајќи дека за оваа трагедија не била преземена политичка и морална одговорност.
Од партијата наведуваат дека за време на ковид-пандемијата Македонија била меѓу земјите со висока смртност по глава на жител и сметаат дека поради тоа Филипче нема кредибилитет да говори за состојбите во здравството.
Во соопштението, ВМРО-ДПМНЕ наведува дека нивна цел е ефикасен, транспарентен и пациентите ориентиран здравствен систем, со инвестиции во медицинскиот кадар, современа опрема, подобри услови за лекување и поголема одговорност при носењето одлуки.
