Сонот за подобар живот во Европа завршил трагично за 26-годишната мароканска фудбалерка Фатен Бен Омар Ел Азизи, која се удавила во обид да стигне од Мароко до шпанската енклава Сеута.
Фатен долго време играла фудбал за женскиот клуб Магреб Атлетико Тетуан. Тренирала двапати неделно, но од спортот не можела да обезбеди доволно средства за живот. За победа заработувала околу 25 евра, додека за пораз не добивала ништо.
Покрај фудбалот, работела и на најстарите гробишта во Тетуан, каде што ги чистела гробовите и продавала китки босилек на посетителите. Татко ѝ починал кога имала 12 години, па таа финансиски го помагала семејството.
„Сонуваше преку фудбалот да стигне до Европа“, раскажала нејзината мајка Џамила.
Фатен загинала на 30 јули, заедно со десетици други мигранти кои се обидувале да стигнат до Сеута. Според организацијата „Каминандо Фронтерас“, најмалку 141 лице го загубило животот во масовниот обид за преминување на шпанската територија, а повеќето од жртвите биле помлади од 35 години.
Особено трагичен е фактот што токму на денот кога Фатен се обидела да стигне до Шпанија, нејзината мајка добила повик од конзулатот со вест дека на нејзината ќерка ѝ била одобрена шпанска виза.
Службеникот ја известил дека треба да дојде во конзулатот во Танжер за да ја подигне визата. Мајката, сепак, не знаела дека Фатен воопшто поднела барање и не можела да разбере зошто решила да го ризикува животот со преминување на морето.
Последните недели, според неа, Фатен била тивка, тажна и повлечена.
Нејзината смрт се случила во период на зголемено незадоволство кај младите во Мароко, каде што невработеноста и ниските приходи ги ограничуваат можностите за иднината. Истовремено, земјата инвестира значителни средства во подготовките за Светското првенство во 2030 година, чиј домаќин ќе биде заедно со Шпанија и Португалија.
По исчезнувањето на Фатен, семејството ја барало цела ноќ. Нејзината сестра подоцна го идентификувала телото.
Но, семејната трагедија не завршила тука. Нејзината мајка дознала дека и други две нејзини деца се обиделе да стигнат до Сеута. Едниот син успеал да стигне и да ѝ се јави, додека за нејзината 14-годишна ќерка сè уште нема сигурни информации.
„Сега останав сама, без деца“, рекла Џамила.
