Најмалку 11 лица загинаа, а три се повредени во вооружен напад на домашна забава во населбата КваМахута, на околу 30 километри јужно од Дурбан во Јужна Африка.
Нападот се случил во вторникот вечерта, кога тројца вооружени мажи упаднале во куќата во која биле собрани повеќе лица и отвориле оган. Полицијата потврди дека меѓу загинатите има и бремена жена.
Според јужноафриканската полиција, десет лица, меѓу кои и една жена, починале на местото на нападот. Уште четворица повредени биле пренесени во болница, каде што едно од нив подоцна им подлегнало на повредите.
Напаѓачите засега се во бегство, а полицијата трага по нив. Никој досега не е уапсен.
Мотивот за нападот официјално не е потврден. Полицијата соопшти дека некои од лицата кои биле во куќата ѝ биле познати од претходни криминалистички истраги, но не откри повеќе детали за тие случаи.
Надлежните не ја исклучуваат можноста пукањето да е поврзано со судир меѓу спротивставени криминални групи. Истрагата за нападот продолжува.
