Според албанските медиуми, синоќа во Тирана се одржал најмасовниот протест во поновата историја на Албанија, на кој учествувале неколку стотици илјади граѓани, меѓу нив и голем број Албанци од дијаспората и од соседните земји.
Демонстрациите започнале во 19 часот на плоштадот „Скендербег“, а потоа колоната се упатила кон плоштадот „Народни херои“ и зградата на Владата. Пред присутните се обратиле повеќе говорници, повторувајќи ги барањата за оставка на премиерот Еди Рама и формирање непартиска влада со едногодишен мандат.
Посебно внимание привлекла симболиката на протестот, кој се одржал на денот кога Рама го прославил својот 62. роденден. Демонстрантите донеле бетонска торта со натпис „Уште 100 години затвор“, украсена со фламинга, но најмногу реакции предизвикало носењето ковчег, што наиде на осуди на социјалните мрежи.
За време на протестот се вееле албански и американски знамиња, а се извикувале пароли „Рама, оди си“, „Рама во затвор“ и „Нова Албанија“.
По неколкучасовниот марш, демонстрантите се собрале пред Полицискиот комесаријат број 3, каде што се задржани 21 лице, приведени по протестот пред албанскиот парламент. Тие побарале нивно ослободување, а дел од учесниците фрлале тврди предмети кон објектот, при што биле искршени прозорци. Полицијата интервенирала со водени топови.
Организаторите најавија дека протестите ќе продолжат и денеска пред Судот во Тирана, каде што треба да се одлучува за мерките против приведените, а порачаа дека демонстрации ќе се одржуваат секојдневно сè до, како што велат, заминувањето на премиерот Еди Рама.
