Во пресрет на Светското првенство во спортски риболов на крап, кое годинава ќе се одржи на Мавровското Езеро, Јавната установа Национален парк Маврово, во соработка со Македонската риболовна федерација, реализираше ново порибување на езерото со 2.092 килограми крап.
Од Националниот парк информираат дека активноста е дел од подготовките за успешно организирање на светскиот шампионат, но истовремено има и долгорочно значење за заштитата и унапредувањето на рибниот фонд, зачувувањето на биолошката разновидност и одржливото управување со природните ресурси.
Организаторите оценуваат дека Светското првенство претставува значајна можност за меѓународна промоција на Националниот парк Маврово и на Македонија како атрактивна дестинација за спортски риболов, активен туризам и природни богатства.
Воедно, останува во сила времената забрана за спортски риболов на крап, која ќе важи до завршувањето на Светското првенство. Од Националниот парк апелираат до граѓаните да ја почитуваат оваа мерка, бидејќи таа е важна за заштита на порибениот фонд и за обезбедување фер услови за натпреварувањето.
За спроведување на мерките, Службата за заштита на природата при ЈУ Национален парк Маврово врши засилени теренски контроли и 24-часовен мониторинг на Мавровското Езеро. Секое прекршување на законските прописи и на важечките забрани ќе биде санкционирано согласно закон.
Од Националниот парк упатија благодарност до Македонската риболовна федерација за успешната соработка и заедничката подготовка на овој престижен меѓународен спортски настан, оценувајќи дека ваквите активности дополнително го зацврстуваат статусот на Мавровското Езеро како една од најзначајните спортско-риболовни дестинации во регионот.
