Пратеничката и поранешна министерка за одбрана Славјанка Петровска со објава на социјалните мрежи реагираше по објавените снимки и сведоштва за семејно насилство што денес ја вознемирија јавноста, оценувајќи дека проблемот не е само во насилникот, туку и во општествената толеранција кон ваквите појави.
„Жестоко ме вознемирија снимките и сведоштвата што денес ја потресоа јавноста. Ако пред очи на луѓе жена е тепана и давена, а од околината стигнува реченица од типот ‘маж ѝ е, што сака нека ѝ прави’, тогаш проблемот не е само во насилникот. Проблемот е и во страшната нормализација на насилството“, напиша Петровска на социјалните мрежи.
Таа потенцира дека ниту еден маж нема право да понижува, тепа, дави, контролира или заплашува жена и порача дека ниту една жртва не смее да остане сама.
Петровска потсети дека државата располага со Закон за спречување и заштита од насилство врз жените и семејно насилство, нагласувајќи дека институциите не смеат да останат само набљудувачи.
„Институциите, а пред сѐ МВР, мораат да постапуваат брзо, одлучно и без компромис кога има сомнеж за семејно или родово базирано насилство. Граѓаните имаат и обврска и право да пријават преку 192 или 112“, истакна таа.
Во својата објава, Петровска повика на нулта толеранција за семејното насилство, итна реакција од надлежните институции, поголема заштита на жртвите и подигнување на јавната свест дека насилството не е приватна работа.
„Најопасната реченица во едно општество е: ‘Не се мешај’. Напротив, мора да дејствуваме. Мора да пријавиме. Мора да се спротивставиме. Бидејќи молкот го штити насилникот“, порача Петровска.
Таа изрази поддршка за сите жени и деца кои се соочуваат со страв, закани и насилство, оценувајќи дека борбата против семејното насилство е борба за достоинство, безбедност и човечност.
