Пратеничката и поранешна министерка за одбрана, Славјанка Петровска, повика на итна државна интервенција по проблемите со водоснабдувањето во Гостивар, оценувајќи дека во овој момент на граѓаните им се потребни конкретни решенија, а не политички препукувања.
Според Петровска, Владата треба привремено да го преземе управувањето со водоснабдителниот систем од локалната самоуправа сè додека не се утврди целосната состојба и не се обезбеди безбедно снабдување со вода.
Таа смета дека кога локалните институции не се во можност да обезбедат безбедна вода за пиење, државата има обврска да интервенира, наместо одговорноста да ја префрла на други институции.
Петровска исто така побара итно да започне стручно чистење, испирање и дезинфекција на целата водоводна инфраструктура, проследени со независни и континуирани анализи на квалитетот на водата. До потврдата дека водата е целосно безбедна, како што наведува, секое домаќинство треба да добива чиста вода за пиење.
„Не се потребни нови соопштенија дека состојбата се следи, ниту нови комисии. Потребни се одлуки, конкретна акција и безбедна вода. Водата не е локално или партиско прашање, туку основно човеково право. Одговорната власт нуди решенија, а не изговори“, порача Петровска.
