Кинески лекари изведоа историски медицински зафат, откако за првпат во светот пресадија два бубрега и цел црн дроб од генетски модифицирана свиња на човек со потврдена мозочна смрт.
Станува збор за 53-годишен пациент, кај кого функцијата на трансплантираните органи била одржувана речиси пет дена, со согласност на неговото семејство. Според студијата објавена во научното списание „Med“, во првите 24 часа не биле забележани знаци на отфрлање на органите.
Повеќето досегашни ксенотрансплантации – трансплантации на животински органи кај луѓе – опфаќаа само еден орган. Во изминатите години, мал број пациенти примиле свински срца, бубрези, делови од црн дроб и бели дробови, додека клинички испитувања веќе се спроведуваат во САД и Кина.
Најновата процедура ја предводел клиничарот и научник Сјујонг Сун од Втората придружна болница при Медицинскиот универзитет Гуангси во Нанинг. Тој посочува дека досега кај луѓе биле трансплантирани само делови од свински црн дроб, а ова е прв случај на истовремена трансплантација на повеќе витални органи.
Пациентот претходно боледувал од тешка хронична бубрежна болест и претрпел мозочно крварење, по што била констатирана мозочна смрт. Неговиот црн дроб бил здрав и бил дониран на друг пациент.
Органите потекнувале од свиња со шест генетски модификации. Научниците вметнале три човечки гени за да го намалат ризикот од нарушувања во згрутчувањето на крвта, а отстраниле три свински гени со цел да го намалат ризикот од имунолошко отфрлање.
Само 19 часа по трансплантацијата, свинскиот црн дроб почнал да лачи жолчка и покажувал знаци на нормално функционирање. Истовремено, вредностите на креатинин и уреа кај пациентот се вратиле во нормални граници, што укажувало дека и бубрезите успешно ја извршувале својата функција.
Сепак, 36 часа по операцијата, лекарите забележале рани знаци на имунолошко отфрлање. Дел од свинските клетки постепено биле заменувани со човечки, а биле забележани и мали жаришта на оштетено ткиво и згрутчување на крвта во црниот дроб.
Истражувачите идентификувале и зголемено присуство на имунолошки клетки поврзани со воспалителни процеси, што отвора можност тие во иднина да бидат таргетирани со специфични лекови за да се намали ризикот од долгорочно отфрлање на органите.
Иако експертите предупредуваат дека мултиорганските ксенотрансплантации нема наскоро да станат рутинска практика, тие сметаат дека овој успех претставува значаен чекор во потрагата по решение за хроничниот недостиг од донорски органи.
Пред ваквите процедури да се применат кај живи пациенти, научниците најавуваат дополнителни испитувања на клинички мртви лица и животински модели, како и темелна проверка за евентуален пренос на вируси и бактерии од свињите на луѓето.
