Заменик-претседателот на рускиот Совет за безбедност и поранешен претседател на Русија, Дмитриј Медведев, упати остри пораки кон Украина, оценувајќи дека за Киев повеќе не треба да важат никакви правила поради, како што наведе, сè поинтензивните напади врз руски градови.
Во објава на социјалните мрежи, Медведев ја обвини Украина за масовни напади и порача дека Русија не треба да биде ограничена во својот одговор.
„Со оглед на масовните напади на непријателот врз нашите градови, чии размери се зголемуваат, време е отворено да се каже дека за неонацистичкиот режим во Киев повеќе нема никакви правила“, напиша Медведев.
Тој истакна дека единствената граница што не смее да се премине, според него, е намерното и свесно таргетирање на цивили.
Во истата објава, Медведев ја доведе во прашање и актуелноста на меѓународните правила за војување, оценувајќи дека конфликтите значително се промениле во последниот век.
Според него, современите војни се водат со ракети и беспилотни летала, што, како што тврди, ги прави застарени дел од постојните меѓународни конвенции.
Медведев се повика и на правниот принцип „rebus sic stantibus“, според кој обврските можат да престанат да важат доколку суштински се променат околностите врз кои биле засновани.
Неговите изјави доаѓаат во период на засилени напади и од руската и од украинската страна, додека борбите и натаму продолжуваат без видлив напредок кон политичко решение на конфликтот.
