Италијанската премиерка Џорџа Мелони изјави дека не жали што се обидела да воспостави блиски односи со американскиот претседател Доналд Трамп, и покрај неговите неодамнешни провокации на социјалните мрежи.
„Не, апсолутно не жалам за ништо што направив“, изјави Мелони по завршувањето на самитот на НАТО во Анкара, додавајќи дека нема намера да одговара на објавите на Трамп.
Во истата прилика, таа порача дека Италија ќе ги исполни обврските кон НАТО за зголемување на издвојувањата за одбрана, но самостојно ќе ја определува динамиката и начинот на нивното спроведување, при што приоритет ќе има домашната одбранбена индустрија.
Односите меѓу двајцата лидери, кои претходно беа оценувани како многу блиски, се влошија оваа година. Причина за тоа беше одлуката на Италија да не дозволи американски воени авиони да ја користат базата на Сицилија за напади врз Иран, како и поддршката што Мелони јавно му ја даде на папата Лав XIV по критиките од Трамп.
Минатиот месец Трамп тврдеше дека Мелони го „молела“ за заедничка фотографија на самитот на Г7, што таа категорично го демантираше.
За време на викендот, американскиот претседател на социјалните мрежи објави фотографија со Мелони со коментар: „Потребна е забрана за приближување“.
Во понеделникот Трамп изјави дека односите со италијанската премиерка се влошиле затоа што не сакала да помогне во врска со Иран, но додаде дека и понатаму смета дека таа е „добра личност“, иако, според него, направила грешка.
