Мерц и Макрон со заедничка одбрана и критики кон Кина

Германија и Франција ќе ја продлабочат соработката во областа на одбраната и ќе работат на заеднички одговор на, како што оценија нивните лидери, силниот економски притисок од Кина врз европската економија.

— реклама —

Германскиот канцелар Фридрих Мерц и францускиот претседател Емануел Макрон ги соопштија договорените цели по заедничката седница на владите на двете земји, при што најавија соработка во развојот на противракетна одбрана и ракетни системи со долг дострел.

„Ќе направиме сè што е потребно за да ја заштитиме нашата слобода, безбедност и колективна одбрана“, изјави Мерц.

— реклама —

Двајцата лидери ја обвинија Кина дека не ги почитува правилата на меѓународната трговија, оценувајќи дека преку големи државни субвенции и прекумерно производство создава нелојална конкуренција за европските компании.

— реклама —

„Не сме противници на Кина, ниту во дипломатијата ниту во економијата, но реално ја согледуваме ситуацијата“, рече Макрон, додавајќи дека Европската Унија секојдневно бележи трговски дефицит со Кина од околу една милијарда евра.

Мерц и Макрон разговарале и за идната соработка во областа на нуклеарното одвраќање, во време кога САД најавуваат намалување на своето безбедносно присуство во Европа.

Мерц изјави дека се применува постепен пристап што во иднина би можел да доведе до нова одбранбена доктрина, додека Макрон нагласи дека Франција и натаму самостојно ќе го финансира својот нуклеарен програм и нема планови Германија да учествува во неговото финансирање.