Мерц се закани по обидот за напад со дрон во Лајпциг: „Ќе платат за тоа“

Германската влада наскоро ќе ги објави сознанијата за тоа кој стои зад обидот за напад со дронови на аеродромот во Лајпциг, најави германскиот канцелар Фридрих Мерц, кој порача дека одговорните „ќе платат за тоа“.

Инцидентот се случил на 4 август, кога дрон со експлозив бил насочен кон украински товарен авион. Според информации до кои дошле „Зидојче цајтунг“, НДР и ВДР, безбедносните служби се сомневаат дека во нападот биле користени вкупно три дрона.

— реклама —

Мерц оцени дека случајот во Лајпциг покажува оти Германија сè почесто е цел на хибридни закани.

— реклама —

„Напаѓачите станаа целосно безобѕирни и свесно ризикуваат голема материјална штета, па дури и повреди или смртни случаи“, изјави Мерц.

Тој најави дека федералната влада се подготвува за вакви закани, меѓу другото и преку формирање Центар за дронови во Магдебург. Мерц истакна и дека Германија мора да испрати јасна порака до оние што стојат зад хибридните напади.

— реклама —

„Оние што стојат зад хибридните напади ќе се соочат со сериозни последици“, порача германскиот канцелар.

Поради германската поддршка за Украина, безбедносните служби се сомневаат дека зад нападот би можела да стои Русија.

По новиот бран хибридни напади, германски политичари повикаа на поостар одговор кон Москва. Пратеникот од Социјалдемократската партија Себастијан Фидлер изјави дека е време рускиот претседател Владимир Путин да почувствува вистински последици, вклучително и преку запирање на таканаречената „флота во сенка“ што оперира во близина на германските брегови.