Мицкоски: Да не го забораваме Бледскиот договор и враќањето на моштите на Гоце Делчев

Премиерот Христијан Мицкоски го коментираше пренесувањето на посмртните останки на цар Самоил од Грција во Бугарија, правејќи паралела со враќањето на моштите на Гоце Делчев во Скопје.

Мицкоски рече дека актуелниот настан треба да се разгледува во контекст на Бледскиот договор, постигнат по Втората светска војна.

— реклама —

„Јас тоа го коментирам во насока на Бледскиот договор, кој е постигнат веднаш по капитулацијата на фашистичка Бугарија, која, би рекол, за време на Втората светска војна ја окупирала територијата на денешна Македонија“, изјави Мицкоски.

Тој се осврна и на различните толкувања на улогата на Бугарија во Македонија за време на Втората светска војна, при што упати критики и кон поранешни политичари од опозицијата.

— реклама —

Во однос на враќањето на посмртните останки на цар Самоил, Мицкоски направи паралела со пренесувањето на моштите на Гоце Делчев во Скопје.

„Што се однесува до пренесувањето на моштите, јас би се вратил неколку децении наназад, кога моштите на македонскиот великан Гоце Делчев, како резултат на тој договор – Бледскиот договор – се донесени во Скопје“, рече премиерот.

Тој додаде дека враќањето на моштите на Делчев е историски настан на кој, како што рече, Македонците треба да бидат горди.

— реклама —

„Тоа е нешто што треба нас, како Македонци, да нè прави горди, затоа што моштите на тој великан, кој во своето време бил пред времето, симболизираат многу за македонскиот идентитет“, додаде Мицкоски.

Премиерот оцени дека денес недоволно се зборува за Бледскиот договор и за договореното во тој период.

— реклама —

„Штета е што денес малкумина го споменуваат Бледскиот договор и сето она што било договорено таму“, рече Мицкоски, повторувајќи го својот став за улогата на Бугарија во Македонија за време на Втората светска војна.

Неговата реакција уследи на денот кога посмртните останки што му се припишуваат на цар Самоил беа пренесени од Грција во Бугарија, каде што беше организирана државна церемонија за нивниот пречек.