Мицкоски: „До 1 јули реконструкцијата на Владата ќе биде во Собранието“

Премиерот Христијан Мицкоски денеска најави дека процесот на реконструкција на Владата се одвива според планираната динамика и дека најдоцна до 1 јули предлогот со кадровските промени ќе биде доставен до Собранието.

Одговарајќи на новинарско прашање, Мицкоски рече дека во интерес на процесот засега нема да открива конкретни имиња и кадровски решенија, но потврди дека се разгледуваат различни опции, вклучително и промени на ресори.

— реклама —

„Во добра и пријатна атмосфера беше вчерашниот состанок. Се разгледуваат опции за промена на ресори и мислам дека многу бргу ќе го затвориме овој прв дел од процесот“, изјави Мицкоски.

Тој најави дека денеска ќе се одржи и состанок со коалицискиот партнер ЗНАМ, на кој ќе се разговара за досегашните резултати, но и за слабостите што треба да се надминат.

— реклама —

Според премиерот, до крајот на следната недела, односно до крајот на јуни, треба да бидат финализирани сите договори поврзани со реконструкцијата, по што предлогот ќе биде испратен до пратениците.

— реклама —

Мицкоски посочи дека процесот нема да се задржи само на централната власт, туку ќе продолжи и на локално ниво. Ќе биде направена анализа на работата на директорите на јавните претпријатија и на раководните структури во општините и подрачните единици.

„Имаме места каде што сме исклучително задоволни, но има и места каде што можеме подобро и каде што е потребно да се поправиме“, рече тој.

— реклама —

Паралелно со реконструкцијата, ВМРО-ДПМНЕ планира во втората половина на јули да започне процес на ажурирање на членството и ново зачленување во партијата, кој би траел до крајот на септември.

Според Мицкоски, целиот процес ќе донесе суштински и длабински промени кои треба да бидат заокружени до крајот на летото.