Остри реакции преку соопштение од СДСМ по државната прослава по повод 35 години независност, откако, како што тврдат од партијата, на настанот било прикажано погрешно македонско знаме.
Од СДСМ велат дека пропустот е особено сериозен бидејќи станува збор за официјална државна прослава, за која биле издвоени значителни средства од буџетот. Партијата бара одговор кој го изработил материјалот со погрешното знаме, како и колку чинела неговата изработка.
„Наместо извинување и одговорност, власта се обиде да го оправда пропустот“, обвинуваат од СДСМ.
Од опозициската партија истовремено реагираат и на содржината на видеото подготвено за одбележувањето на 35-годишнината од независноста. Според нив, во него биле изоставени значајни државни достигнувања, меѓу кои членството во НАТО и ОН, како и кандидатскиот статус за членство во Европската Унија.
СДСМ оценува дека станува збор за обид за ревидирање на историјата на македонската независност и обвинува дека власта, како што велат, преку поделби и политички напади се обидува да го прикрие отсуството на сопствени резултати.
Од партијата додаваат дека најзначајните стратешки и државнички достигнувања во изминатите 35 години се реализирани во периоди кога СДСМ ја преземал одговорноста за управувањето со државата.
„Немаат што да запишат свое, па сакаат да избришат од она што веќе е запишано во македонската историја“, стои во реакцијата на СДСМ.
