СДСМ преку соопштение обвини дека премиерот Христијан Мицкоски и ВМРО-ДПМНЕ ја туркаат државата во изолација и, како што наведуваат, работат спротивно на европските интереси на Македонија.
Од партијата во соопштението посочуваат дека додека НАТО и Европска Унија предупредуваат за хибридни закани, руско влијание и концептот „српски свет“ во Западен Балкан, власта, според нив, води политики што ја оддалечуваат земјата од европскиот пат.
Во соопштението се споменува и вицепремиерот Иван Стоиљковиќ, за кого СДСМ тврди дека јавно се поврзувал со Русија и со групата Ноќни волци.
Партијата упати критики и кон новинарот Драган Павловиќ Латас, обвинувајќи го дека води антиевропска пропаганда преку медиуми блиски до унгарскиот премиер Виктор Орбан.
СДСМ повторно отвори и прашање за двојните државјанства, тврдејќи дека дел од функционерите на власта и нивните семејства поседуваат бугарски пасоши.
Од партијата наведуваат дека ВМРО-ДПМНЕ предложила закон за двојно државјанство кој би важел од следниот парламентарен состав, но го повлекла откако СДСМ побарала законот веднаш да се применува и за актуелните функционери.
„Македонија не е тројански коњ. Македонија е европска држава“, порачаа од СДСМ, повикувајќи на реформи и забрзување на европската интеграција.
