Од СДСМ преку соопштение оценуваат дека најавената реконструкција на Владата, за која Собранието треба да гласа на 13 јули, претставува обид за дополнителна концентрација на моќта во рацете на премиерот Христијан Мицкоски, а не вистинска реформа.
Според партијата, промените во министерските ресори се само кадровски, додека политиките остануваат непроменети.
„Она што се претставува како ‘освежување’ е всушност чист театар. Се менуваат министри, но политиките остануваат исти. Се менуваат лица, но неуспесите продолжуваат. Ова не е реформа – ова е консолидација на лична власт“, наведуваат од СДСМ.
Во соопштението се тврди дека сите клучни одлуки се носат во кабинетот на премиерот, додека коалициските партнери се сведени на споредна улога, а институциите, како што велат, стануваат сервис на премиерот.
Од СДСМ оценуваат дека реконструкцијата нема да донесе подобрување на животниот стандард, намалување на цените, повисоки плати или побрза европска интеграција, туку само дополнителна концентрација на власта.
„На Македонија не ѝ треба премиер кој сака сам да биде Владата. Ни треба систем, силни институции и европски стандарди кои ќе ја вратат довербата на граѓаните“, наведуваат од партијата.
Од СДСМ порачуваат дека, како што велат, „Фронтот за вистина и правда“ има цел власта повторно да ја врати во рацете на граѓаните.
