Премиерот Христијан Мицкоски оцени дека СДСМ и Левица непринципиелно се однесуваат во процесот за донесување на новиот Изборен законик, тврдејќи дека првично постоел консензус, кој подоцна бил нарушен.
Во интервју за емисијата „Директно“ на ТВ Телма, Мицкоски изјави дека Владата направила сè за да обезбеди политички договор и дека во текот на викендот бил постигнат консензус околу текстот на законот.
„Сите препораки на ОБСЕ/ОДИХР беа вклучени во реформите на Изборниот законик. Она што ја прели чашата беше обидот на Левица да калкулира, а потоа и СДСМ да го следи нивниот пример и преку филибастеринг да го блокира носењето на законот“, рече Мицкоски.
Тој посочи дека сите барања на Левица биле прифатени и вградени во законското решение, но дека партијата во последен момент одлучила да не го поддржи законот.
Мицкоски нагласи дека и барањата на СДСМ можат да бидат прифатени доколку бидат поднесени како амандмани.
„Ако проблемот е начинот на гласање или постизборните жалби, нека поднесат амандмани и веднаш ќе ги прифатиме“, изјави премиерот.
Според него, единственото барање на ВМРО-ДПМНЕ е да се овозможи електронско гласање на дијаспората на следните претседателски избори.
„Нашата цел е да ѝ овозможиме на дијаспората електронски да гласа во ера на вештачка интелигенција, но и да ги намалиме трошоците за организирање гласање во дипломатско-конзуларните претставништва“, рече Мицкоски.
Тој додаде дека очекува сите политички чинители да останат доследни на претходно постигнатите договори и да го поддржат новиот Изборен законик.
