Граѓаните сами ќе избираат дали ќе уплаќаат во вториот пензиски столб, најави Мицкоски

Граѓаните ќе можат самостојно да одлучуваат дали пензиските придонеси ќе ги уплаќаат само во државниот фонд или ќе продолжат да користат комбиниран систем со приватен пензиски столб. Ова го најави премиерот Христијан Мицкоски, посочувајќи дека Владата разгледува промени во пензискиот систем.

Според Мицкоски, компаниите што управуваат со средствата во вториот пензиски столб не остваруваат приноси на очекуваното ниво, кои, како што тврди, се трипати пониски од предвиденото.

— реклама —

Тој оцени дека управувачките друштва не ги искористиле соодветно средствата на осигурениците и дека граѓаните не треба да ги трпат последиците од нивното работење. Поради тоа, Владата разгледува хибриден модел со кој секој осигуреник би можел сам да одлучи дали ќе остане само во државниот пензиски фонд или ќе уплаќа придонеси и во приватниот столб.

— реклама —

Мицкоски објасни дека потребата од промени станала поочигледна откако првите корисници почнале да ги добиваат пензиите од вториот столб, кои, според него, се премногу ниски. Тој додаде дека државата потоа мора дополнително да интервенира за да се обезбеди минимална пензиска сигурност.

Премиерот ова го соопшти при почетокот на изградбата на новата фаза од вакуумската канализација во Јурумлери, општина Гази Баба.

— реклама —

Прашањето за работењето на пензиските фондови е актуелно и по ревизорскиот извештај за Фондот за пензиско и инвалидско осигурување за 2024 година, објавен во јуни. Во него е утврдено дека ПИОМ не ги префрлал редовно средствата во вториот пензиски столб, иако законската обврска предвидува тоа да го прави во рок од пет работни дена. Според извештајот, долгот кон вториот столб изнесува 42 милиони евра, а неплатените средства не се на личните сметки на осигурениците и не остваруваат принос.

Од вкупниот придонес за пензиско осигурување од 18,8 проценти од бруто-платата, 12,8 проценти се уплаќаат во државниот фонд, а шест проценти на индивидуалната сметка на осигуреникот во приватниот пензиски фонд. Средствата од вториот столб се инвестираат на пазарите на капитал со цел да остварат принос и да ја зголемат идната пензија.

Сегашниот систем предвидува пензијата да се исплаќа од првиот и вториот столб, а осигурениците можат дополнително да штедат и преку третиот, доброволен пензиски столб.