„Мицкоски нема право да го блокира европскиот пат на Македонија“, вели Филипче

Претседателот на СДСМ, Венко Филипче, на денешната прес-конференција порача дека актуелната власт нема право да го запре европскиот пат на државата и побара граѓаните да добијат можност да се изјаснат за иднината на земјата.

Одговарајќи на новинарско прашање, Филипче истакна дека Владата има обврска да распише референдум бидејќи, како што рече, дошла на власт со ветувања кои не ги исполнила.

— реклама —

„Власта има обврска да распише референдум, затоа што нема право да го запре европскиот пат на земјата, затоа што излажаа дека ќе обезбедат подобра преговарачка позиција и никогаш не кажаа дека ќе го блокираат европскиот пат на земјата“, изјави Филипче.

Тој посочи дека ВМРО-ДПМНЕ ветувала враќање на името на државата, укинување на Преспанскиот договор и промени во односите со соседите, но дека ниту едно од тие ветувања не било реализирано.

— реклама —

Филипче оцени дека актуелната власт ја држи државата надвор од европските процеси и ја обвини дека работи спротивно на интересите на граѓаните.

— реклама —

Воедно, тој нагласи дека целта на „Фронтот за слобода и правда“ е обединување на политички партии, граѓански организации, интелектуалци и активисти кои се залагаат за европска иднина на државата.

„Овој фронт има за цел во пресрет на следните избори да ја врати власта во рацете на граѓаните“, рече Филипче.

— реклама —

Според него, одлуката за продолжување на евроинтегративниот процес зависи исклучиво од актуелната власт.

„Ги плаши граѓаните дека се загрозени јазикот и идентитетот, со цел да не се направи чекорот кој не носи никаков ризик, а тоа се уставните измени“, додаде лидерот на СДСМ.