Мицкоски очекува раст на бруто-домашниот производ од 3,5 до 4 отсто

Премиерот Христијан Мицкоски очекува македонската економија годинава да оствари раст меѓу 3,5 и 4 отсто, при што како основа за ваквата проценка го посочи остварениот раст во првото полугодие.

— реклама —

Одговарајќи на новинарско прашање, Мицкоски рече дека во разговорите со претставници на Светска банка охрабрува фактот што Македонија, според него, е единствената земја во регионот кај која проценката за економскиот раст е коригирана во позитивна насока.

Тој посочи дека годината започнала со проценка за раст на бруто-домашниот производ од 2,6 отсто, која потоа била зголемена на 2,9 отсто, а вчера била коригирана на 3,2 отсто.

— реклама —

„Јас сум убеден дека оваа година растот на бруто-домашниот производ ќе биде меѓу 3,5 и 4 отсто“, рече Мицкоски.

— реклама —

Како аргумент за своето очекување тој го посочи растот од 3,7 отсто во првото полугодие, остварен по раст од 3,1 отсто во првиот квартал и 4,3 отсто во вториот квартал.

Мицкоски очекува Македонија да има и ниска инфлација, односно, како што рече, да биде меѓу земјите со најниска инфлација во регионот и Европа.

Во однос на економскиот раст, тој очекува Македонија да се најде меѓу првите пет земји во регионот и Европа, иако не очекува да има највисок раст.