Претседателот на Владата, Христијан Мицкоски, во обраќањето пред 81. Генерално собрание на Обединетите нации во Њујорк ги претстави главните стратешки определби на Македонија, посочувајќи ги членството во НАТО, стратешкото партнерство со САД и полноправното членство во Европската Унија.
Мицкоски нагласи дека овие определби не ги гледа како одделни политики, туку како една геополитичка ориентација заснована врз демократијата, колективната безбедност, владеењето на правото и отворената економија.
„Македонските граѓани знаат каде припаѓаат. Ние сме сојузник во НАТО. Соединетите Американски Држави се наш стратешки партнер. Полноправното членство во Европската Унија е наша стратешка определба. Тоа не се три одвоени политики. Тоа е една геополитичка ориентација“, рече Мицкоски.
Премиерот додаде дека јасноста во стратешките сојузи, според него, не значи изолација или откажување од соработка со држави со различна историја, интереси и политички ставови.
„На светот не му е потребна уште една поделба на трајни табори. Потребна му е конкуренција со граници и со правила што сите мора да ги почитуваат. Сојузи што преземаат одговорност. И меѓународни институции што остануваат простор за дијалог токму тогаш кога дијалогот е најтежок“, порача Мицкоски.
Во завршниот дел од обраќањето тој се осврна и на идентитетот, историјата и амбициите на земјата. Посочи дека Македонија е мала држава според територијата, но дека тоа не треба да го ограничува нејзиниот стремеж да биде сериозна и самостојна држава.
„Нашата амбиција е да станеме сериозна држава. Држава на која нејзините сојузници можат да ѝ веруваат. Држава во која младите можат да ја планираат својата иднина. Држава што ги почитува различноста и мултикултурниот карактер на своето општество“, рече премиерот.
Мицкоски нагласи и дека земјата треба да биде доволно сигурна во себе за да го брани сопствениот идентитет, без да го негира идентитетот на другите.
„Држава што ја знае својата историја, но не е заробена во неа. И држава што не очекува другите да ја изградат наместо неа. За мене, тоа е современ суверенитет. Не изолација. Способност“, истакна тој.
Во своето обраќање Мицкоски се повика и на пораката на генералниот секретар на ОН, Антонио Гутереш, кој потсетил дека Повелбата на Обединетите нации започнува со зборовите „Ние, народите“.
Според Мицкоски, токму принципот на свет управуван според правила е причината поради која една мала европска земја продолжува да верува во Обединетите нации, дури и кога е разочарана од нивното функционирање.
„Алтернативата на свет управуван според правила не е свет во кој сите се слободни. Тоа е свет во кој најсилните се најслободни. А сите други зависат од нивната добра волја. Таков свет можеби за миг може да изгледа ефикасен. Но никогаш не е стабилен“, порача Мицкоски.
