Премиерот Христијан Мицкоски бара во разговорите со Бугарија да биде вклучен и претставник на Европската Унија, оценувајќи дека е потребно присуство на меѓународната заедница во процесот. Во интервју за МИА од Вашингтон, тој порача дека не е подготвен да влезе во процес без предвидлив крај.
Мицкоски рече дека за спорот со Бугарија веќе се разговара со претставници на Советот и Европската комисија, меѓу кои и претседателот на Европскиот совет, Антонио Кошта, и шефицата на европската дипломатија, Каја Калас.
Според него, за напредок е потребна доверба меѓу двете страни и желба за решение од двете страни.
„Не се инаетиме, не сме тврдоглави“, порача Мицкоски, додавајќи дека Македонија е подготвена да разговара и за усогласување на акцискиот план за малцинствата, но со присуство на меѓународната заедница.
Во меѓувреме, еврокомесарката за проширување, Марта Кос, порача дека Европската Унија мора да се подготви за нови членки. Таа ги посочи внатрешните реформи, владеењето на правото и заштитните механизми против уназадување на демократијата како едни од главните предизвици.
Кос најави дека Европската комисија на крајот на септември ќе објави идеи за подготовка на Унијата за нови членки.
Таа претходно упати порака до Скопје и Софија, споредувајќи ги обврските на двете страни: Македонија да го спроведе договореното и да ги исполни уставните измени, а Бугарија потоа да даде поддршка за продолжување на процесот.
