Мицкоски предупредува: За 15 до 25 години може да останеме со помалку од 500.000 вработени, тогаш ќе настанат вистински проблеми

Премиерот Христијан Мицкоски предупредува дека стареењето на населението и ниската стапка на фертилитет во следните децении може сериозно да го намалат бројот на работници во Македонија и да создадат проблеми за пензискиот и здравствениот систем и за економијата во целина.

Тој се осврна на предупредувањата на Светска банка за стареењето на населението и намалувањето на расположливата работна сила, посочувајќи дека во моментов во земјава има околу 709.000 регистрирани вработени.

Според неговата проценка, за да може Македонија да остварува интензивиран економски раст од над 5%, потребни се најмалку 800.000 вработени.

— реклама —

„Во моментот на пазарот на труд имаме 709.000 регистрирани вработени. Ние не смееме да бидеме под бројката од 800.000 вработени ако сакаме да имаме добар економски раст, односно интензивиран економски раст од 5% плус. Значи, во моментот треба да најдеме нови 90.000 вработени кои ќе создаваат доход во државата“, рече Мицкоски.

Многу поголем проблем, според него, може да се појави во следните 15 до 25 години.

„Се плашам дека за 15, 20, 25 години од денеска таа бројка ќе дојде под 500.000. Тогаш ќе настанат вистинските проблеми. И за пензискиот систем, и за здравствениот, и за државата, и во целост во економијата“, предупреди премиерот.

— реклама —

Тој оцени дека земјата во моментов сè уште располага со одреден демографски „резервоар“ од претходните генерации, но дека последиците од ниската стапка на фертилитет ќе стануваат сè повидливи во следните децении.

„Тоа што го зборував јас пред година и пол-две, ние ќе го почувствуваме за 15-20 години уште повеќе. Сега сè уште имаме одреден резервоар кој е од минатото. Но, кога ќе дојдат 15-20 години од денеска, тогаш ќе биде алармантна состојбата“, рече Мицкоски.

Како една од мерките за справување со недостигот на работници, тој го посочи продолжувањето на можноста за работен ангажман на повозрасните лица.

Според Мицкоски, оние кои се чувствуваат работоспособни можат под одредени услови да продолжат да работат и по исполнувањето на условите за пензионирање, додека во одредени дефицитарни области, како здравството, постојат решенија за продолжување на ангажманот и до 70-годишна возраст.

— реклама —

Тој оцени дека стареењето на населението и нискиот наталитет не се проблем само на Македонија, туку тренд со кој се соочуваат и европските држави.

Мицкоски повторно ги поврза демографските движења со потребата од, како што ги нарече, просемејни политики.

„Кога зборувам за просемејни политики, тогаш треба да бидам сериозно сфатен, затоа што ова е начинот на кој ние мораме да се движиме“, рече премиерот.

— реклама —

Како друга можност за надоместување на недостигот на домашни работници, тој го посочи увозот на работна сила, но предупреди дека таквиот процес носи дополнителни општествени предизвици.

Мицкоски рече дека искуствата на развиените земји покажуваат дека неконтролираниот увоз на работна сила може да создаде проблеми поврзани со интеграцијата на луѓе со различен менталитет и култура.

Светска банка во своите анализи навистина го посочува стареењето како еден од клучните долгорочни предизвици за пазарот на труд во Западен Балкан. Според Банката, населението во регионот старее меѓу најбрзите стапки во Европа, а во следната деценија најмалку еден од пет жители се очекува да биде постар од 65 години. Истовремено, иселувањето дополнително го намалува бројот на луѓе во работоспособна возраст.