Премиерот Христијан Мицкоски на новинарско прашање околу парламентарните избори изјави дека Владата и натаму ја преферира опцијата за редовни парламентарни избори во 2028 година, но нагласи дека ВМРО-ДПМНЕ е подготвена и за други можни политички сценарија.
Одговарајќи на новинарско прашање дали неодамнешните негови изјави за избори се однесуваат на предвремени парламентарни избори следната година или на редовните во 2028 година, Мицкоски рече дека со влегувањето во втората половина од мандатот е потребна политичка подготвеност.
„Јас само сакам да констатирам факт дека ние влегуваме во втората половина од мандатот и политички мудро е, кога ќе влезете во втората половина на мандатот, да бидете подготвени на секакви сценарија“, изјави Мицкоски.
Тој повтори дека ставот на Владата останува непроменет.
„Ние сме кажале дека наша опција, која ја преферираме како Влада, е редовни избори во 2028 година. Но сме подготвени секогаш, како политичка партија, доколку тоа опозицијата го бара, да излеземе на терен и повторно да победиме“, порача премиерот.
Со ова, Мицкоски не ја исклучи можноста за предвремени избори, но потенцираше дека приоритет на Владата останува завршување на мандатот и одржување редовни парламентарни избори во 2028 година.
