Мицкоски: Разговараме со „Рамбл“ и уште пет компании за дата-центри во Македонија

Владата разговара со „Рамбл“ на Крис Павловски и со уште пет компании за инвестиции поврзани со дата-центри во Македонија, откри премиерот Христијан Мицкоски во интервју за МИА за време на престојот во Вашингтон.

Мицкоски вели дека дата-центрите се дел од долгорочната економска стратегија на Владата и дека државата мора да се насочи кон високотехнолошка индустрија со поголема додадена вредност.

„Дата-центрите се иднината. Тоа е процес којшто е неповратен. Човештвото се движи во таа насока, а секој кој има дилема, не ѝ мисли добро на сопствената држава“, рече Мицкоски.

— реклама —

Во однос на дилемите за потрошувачката на вода и начинот на разладување на ваквите капацитети, премиерот тврди дека Владата ќе гарантира оти дата-центрите за кои се разговара ќе користат затворен систем на разладување и нема да трошат големи количества вода.

„Сите кои не се разбираат во високата технологија зборуваат за бучава, за водено ладење. Ние сега имаме и воздушно ладење и фреонско ладење“, рече Мицкоски.

Тој остро ги критикуваше политичките противници кои се спротивставуваат или изразуваат резерви кон ваквите проекти, оценувајќи дека граѓаните сакаат државата да се движи напред.

Мицкоски потврди дека една од компаниите со кои веќе се водат разговори е „Рамбл“, поврзана со Крис Павловски.

— реклама —

„Го спомнавте Крис Павловски и ‘Рамбл’ – тие сега направија аквизиција, купија компанија во Германија и сега се компанија од околу пет милијарди долари. Тоа е една сериозна групација која сериозно се развива. Да, разговараме со него. Меѓу другото, имаме уште пет други компании со кои разговараме“, рече премиерот.

Според Мицкоски, економската политика на Владата во следниот период треба да се темели на три главни столба – патна и железничка инфраструктура, енергетска инфраструктура со нови производствени капацитети и преносни системи и инвестиции во висока технологија.

Како дел од третиот столб ги посочи токму дата-центрите, но и потребата од диверзификација на преработувачката индустрија.

— реклама —

Премиерот смета дека структурата на странските инвестиции мора да се менува бидејќи голем дел од компаниите кои инвестирале во земјата во периодот од 2008 до 2012 година се поврзани со автомобилската индустрија, каде, како што вели, состојбите се менуваат.

Дополнителен проблем, според него, е намалувањето на расположливата работна сила.

„Веќе трудово интензивната индустрија ние нема да можеме да ја сервисираме во иднина, имаме сè помалку работна сила“, рече Мицкоски.

Затоа, според него, на Македонија ѝ е потребна високотехнолошка индустрија со голема додадена вредност, која треба да придонесе за раст на бруто-домашниот производ и животниот стандард.

Мицкоски вели дека станува збор за процес кој не може да заврши во рамките на еден владин мандат, туку треба да прерасне во долгорочна национална стратегија.

„Овој процес нема да биде за еден мандат. Ова е процес кој треба да трае два, три, четири мандати. Не велам дека оваа Влада ќе биде толку долго, ниту пак јас пледирам да бидам претседател на Владата толку долго. Но, во суштина, ова треба да биде национална стратегија за тоа како треба да се развива државата“, рече Мицкоски.

Според него, развојот на вештачката интелигенција и дигиталните услуги дополнително ја зголемува потребата од ваква инфраструктура.