Премиерот Христијан Мицкоски очекува инфлацијата во земјава да се движи меѓу 4 и 5 проценти, нагласувајќи дека владините мерки имаат за цел да спречат повторување на ценовниот шок од 2022 година.
Одговарајќи на новинарско прашање за разликите во цените на горивата и потребата од таргетирани економски мерки, Мицкоски истакна дека тековните политики се насочени кон контрола на инфлацијата и стабилизација на економијата.
„Робусните мерки се првиот чекор којшто го преземаме. Очекуваме да тоа влијае при контрола на инфлацијата, ако се вратиме во 2022-та, март-април ќе беше двоцифрена, јас очекувам да ние сега во март некаде на половина од тоа што било тогаш“, изјави премиерот.
Тој посочи дека според тековните анализи и дневните следења на пазарот, инфлацијата веќе се стабилизира.
„Врз основа на пресметките кои ги правиме, бидејќи следиме на дневна основа со Државниот пазарен инспекторат, очекуваме тука помеѓу 4 и 5%“, рече Мицкоски.
Премиерот направи споредба и со состојбите во регионот, наведувајќи дека слични нивоа на инфлација се бележат и во други земји.
„Хрватска објави, мислам дека се оние негде 4,8, така нешто. Очекувам тука да сме и ние, да не биде двоцифрена како што тоа било“, додаде тој.
Во однос на барањата за таргетирани мерки за најранливите категории граѓани, премиерот не даде конкретен одговор, но потенцираше дека Владата ќе продолжи да ја следи состојбата и да реагира согласно економските движења.
