СДСМ преку соопштение оценуваат дека Владата на Христијан Мицкоски неоправдано го претставува изборот на Македонија во Економскиот и социјалниот совет на Обединетите нации (ЕКОСОК) како голема дипломатска победа и историски успех.
Според партијата, станува збор за редовна процедура во рамките на Обединетите нации, каде секоја година се избираат нови членки за тригодишен мандат, а изборот е резултат на долгорочна работа на македонската дипломатија низ повеќе владини состави.
Од СДСМ сметаат дека наместо да се создава слика за големи дипломатски достигнувања, Владата треба да се фокусира на европските интеграции и почетокот на преговорите со Европската Унија.
„Вистински успех за Македонија би било отворање на преговорите со ЕУ, нови инвестиции, подобар животен стандард и перспектива за младите“, велат од СДСМ, додавајќи дека граѓаните заслужуваат конкретни резултати, а не политичка пропаганда.
Партијата повторно повика на спроведување реформи и исполнување на условите за продолжување на евроинтегративниот процес.
