„Мицкоски вели дека од денес техничката вода во Гостивар е чиста. Дали му верувате?“, велат од СДСМ

СДСМ преку соопштение реагира на најавите дека од денеска водата во Гостивар е технички исправна за употреба, поставувајќи прашање дали граѓаните можат да имаат доверба во институциите по случувањата изминативе денови.

— реклама —

Од партијата наведуваат дека повеќе од 4.070 граѓани побарале медицинска помош, а само вчера биле регистрирани уште 125 прегледи на лица со симптоми, додека едно дете било хоспитализирано.

Според СДСМ, водата била загадена со фекалии, а институциите не реагирале навреме. Посочуваат дека првите симптоми кај граѓаните се појавиле на 14 јули, додека епидемија била прогласена дури на 19 јули.

— реклама —

Од партијата тврдат дека во тие пет дена јавноста не била навремено информирана, ниту биле преземени соодветни мерки, иако, како што велат, голем број граѓани завршиле во амбуланти и болници.

— реклама —

Во реакцијата се потсетува и на изјавата на министерот за здравство Сашо Клековски, кој потврди дека имало отстапувања во анализираните примероци, но според СДСМ, предупредувањето дошло предоцна.

„Ова не е технички пропуст, туку системски колапс. Кога институциите молчат додека илјадници луѓе се трујат, тогаш повеќе не станува збор за грешка, туку за однос кон граѓаните“, наведуваат од СДСМ.

— реклама —

Од партијата оценуваат дека одговорноста е јасна и прашуваат кога некој конечно ќе ја преземе, по изјавата на премиерот Христијан Мицкоски дека од денеска техничката вода во Гостивар е безбедна за користење.