Мицкоски: Во 2021 имало над 400 пријави за неквалитетна вода во Гостивар, Обвинителството да отвори истрага

Премиерот Христијан Мицкоски го повика Јавното обвинителство да отвори постапка и да ги испита наводите дека во 2021 година биле евидентирани повеќе од 400 пријави за неквалитетна вода во Гостивар, без, како што рече, да бидат преземени соодветни мерки за заштита на здравјето на граѓаните.

— реклама —

Одговарајќи на новинарско прашање за критиките од опозицијата во врска со состојбата во Гостивар, Мицкоски упати остри обвинувања кон СДСМ и нивните поранешни функционери во здравството.

— реклама —

Тој изјави дека во 2021 година, кога актуелниот претседател на СДСМ бил министер за здравство, а денешниот претставник на партијата директор во Институтот за јавно здравје, биле регистрирани над 400 пријави за неквалитетна вода во Гостивар.

— реклама —

„Го повикувам Обвинителството да ги провери овие наводи и да отпочне постапка за тоа зошто, кога имале можност, не презеле ништо за да го заштитат здравјето на гостиварци, но и на граѓаните во другите општини“, изјави Мицкоски.

— реклама —

Премиерот додаде дека очекува Обвинителството веднаш да постапи и да изврши проверки во Институтот за јавно здравје и во Агенцијата за храна и ветеринарство со цел да се утврдат сите околности поврзани со овие пријави.