Мицкоски за антикорупцискиот закон на СДСМ: „Помислив дека е за рубриката „Верувале или не““

Премиерот Христијан Мицкоски остро ја критикуваше најавата на лидерот на СДСМ, Венко Филипче, за подготовка на нов закон за борба против корупцијата, оценувајќи ја иницијативата како несериозна и контрадикторна.

Мицкоски изјави дека кога првпат слушнал за оваа идеја, мислел дека станува збор за нешто што би можело да се најде во рубриката „Верувале или не“, поради што одлучил извесен период да не ја коментира.

— реклама —

„Гледам дека тие продолжуваат да ја туркаат оваа работа и навистина веруваат во тоа што го зборуваат“, рече премиерот.

Тој упати серија обвинувања кон раководството на СДСМ, тврдејќи дека токму луѓето кои денес зборуваат за борба против корупцијата претходно учествувале во измени на Кривичниот законик, со кои, според него, биле избришани одредени одредби поврзани со кривичната одговорност.

— реклама —

„Без срам ја убедуваат јавноста во некакви платформи и фронтови за борба против корупцијата, а притоа забораваат што правеа додека беа власт“, изјави Мицкоски.

Премиерот се осврна и на критиките од опозицијата дека со своите јавни настапи влијае врз работата на обвинителството и истражните органи.

— реклама —

„Се обидуваат да се претстават како жртви на политички прогон. Но, не треба да се плашат, затоа што во оваа држава веќе две години владеат законите и Уставот и тие се применуваат“, рече тој.

Мицкоски додаде дека доколку претставниците на опозицијата навистина немаат никаква одговорност, тогаш немаат причина да стравуваат од евентуални судски постапки.

— реклама —

„Ако навистина се безгрешни како што тврдат, тогаш не треба да се плашат од какви било судски процеси. Но, јас не верувам дека работите стојат така“, порача премиерот.

Изјавите на Мицкоски доаѓаат откако СДСМ најави иницијатива за нов закон и платформа за борба против корупцијата, тема што во изминатиот период предизвика нови политички судири меѓу власта и опозицијата.