Мицкоски: За состојбите во Гостивар се консултираме со експерти, не треба партиите да шират хистерија

Претседателот на Владата, Христијан Мицкоски, во интервју за подкастот „Риштази“, говорејќи за случајот со водата во Гостивар, истакна дека надлежните постојано се консултираат со експерти, дека водата во општината веќе може да се користи за технички потреби, а наскоро се очекува да биде безбедна и за пиење. Тој порача и дека политичките партии не треба да шират хистерија.

— реклама —

„На сите треба да ни е јасно дека станува збор за одговорност која е на општината и тоа е многу важно да се констатира, бидејќи тие услуги се исклучиво одговорност на општината. Постои начин како општината комуницира со државните институции во делот на проверките и слично. Што се однесува до Гостивар, од денеска има веќе техничка вода. Изминативе неколку денови параметрите беа позитивни, кога велам во насока на тоа дека инсталациите се прочистени, односно хиперхлорирани, и денеска веќе граѓаните можат да ја користат за техничка употреба, но не и за пиење и готвење“, изјави премиерот Мицкоски.

Тој додаде дека процесот на хиперхлорирање ќе продолжи и во наредните денови и дека очекува во втората половина од оваа недела водата да може да се користи и за пиење и за подготовка на храна.

— реклама —

Во однос на одговорноста, Мицкоски посочи дека директорот на јавното комунално претпријатие не го назначува Владата, туку градоначалникот, и нагласи дека Обвинителството веќе работи на утврдување на евентуалната одговорност.

— реклама —

„Да се однесувате на таков начин е неодговорно и тоа е нешто што најмалку може да се очекува од човек кој е поставен да ја води таа институција. Таму не станува збор за постапка на еден човек, туку на неколку луѓе. Не можете сами да донесете таква одлука и да ја спроведете без да добиете налог или без логистичка поддршка од други лица. Во случајов имаме човечко несовесно однесување“, потенцираше премиерот.

Мицкоски нагласи дека во својот тим има експерти со кои постојано се консултира и чии препораки ги следи. Тој истакна дека институциите брзо реагирале за да обезбедат вода за пиење и упати благодарност до граѓаните, компаниите што донирале вода, како и до сите кои покажале трпение.

— реклама —

„Благодарност и до Град Скопје и до Јавното претпријатие „Водовод и канализација“, кое со свој тим учествуваше во хиперхлорирањето за обезбедување техничка вода, како и до сите кои имаат трпение. Се надевам дека вакви случаи нема да се повторуваат во иднина. Обвинителството си ја врши својата работа, а сега ќе видиме кој сè ќе сноси одговорност“, изјави премиерот Мицкоски.