Министерката за финансии Гордана Димитриеска-Кочоска изјави дека Министерството за финансии веќе дало согласност за вработување на 38 лица на неопределено време на Клиниката за детски болести, посочувајќи дека не може да се одобруваат нови вработувања без да се води сметка за расположливите средства и потребите на останатите здравствени установи.
Одговарајќи на новинарско прашање за протестите на околу 50 вработени, кои тврдат дека работат без плата и дека се неопходни за функционирањето на клиниката, таа рече дека Министерството не одбивало согласности за доктори и медицински персонал.
„Минатата година, кога се добарани согласности за договори на дело, во исто време се дадени и согласности за вработување на неопределено на 38 лица. Ако 38 согласности сме дале на неопределено, сме унапредиле доктори, преземале од други клиники и повеќе од 65 лица во суштина се вработени, мислам дека не можеме да даваме согласности само за една клиника“, рече Димитриеска-Кочоска.
Таа нагласи дека во изминатиот период биле одобрени и унапредувања на доктори и медицински персонал, а за дополнителниот технички персонал треба да се обезбеди финансиско покритие.
На забелешката на новинарот дека дел од лицата работеле со месеци без договори и без плата, министерката одговори дека тоа треба да го објасни директорот на болницата.
„Мислам дека ова прашање треба да го одговори директорот на болницата и како тие луѓе доаѓале на работа, а притоа немале договори. Јас не познавам некој таков да оди на работа, а да нема договор. Прашајте го директорот, треба тој да ви одговори на ова прашање“, изјави министерката.
