„Не сум видовита за да можам да предвидам дека состојбите ќе бидат и понатаму лоши“, вели Димитриеска-Кочоска за вториот ребаланс

Приходите и расходите во Буџетот за 2026 година ќе бидат намалени за по околу 5,3 милијарди денари со вториот ребаланс. Министерката за финансии Гордана Димитриеска-Кочоска објасни дека корекциите се главно поврзани со промените на пазарот на енергенси и мерките преземени за ублажување на ценовниот удар врз граѓаните и компаниите.

Министерката појасни дека измените не се резултат на проблеми со ликвидноста, туку претставуваат навремено приспособување на државната каса кон новите економски услови. Целта, како што посочи, е да се обезбеди непречено функционирање на институциите, редовно сервисирање на обврските и продолжување на мерките за заштита на граѓаните и економијата.

Со ребалансот вкупните буџетски приходи се проектирани на 374,2 милијарди денари, наспроти 379,5 милијарди денари според претходната проекција. Најголема корекција има кај акцизите, каде што приходите се намалуваат од 34,1 на 30,4 милијарди денари. Даночните приходи, пак, се намалуваат од 213,3 на 209,8 милијарди денари.

— реклама —

Димитриеска-Кочоска објасни дека намалувањето на акцизите на горивата директно се одразува врз приходите во Буџетот, додека намалувањето на ДДВ-то за дизелот од 18 на 10 проценти има дополнителен фискален ефект.

–Владата ги презеде овие мерки поради растот на цените на енергенсите и новите геополитички ризици, вели Димитриеска-Кочоска.

На прашањето дали вториот ребаланс е резултат на лошо менаџирање, министерката рече:

— реклама —

Не сум видовита за да можам да предвидам дека состојбите ќе бидат и понатаму лоши, во јуни се стабилизираа цените на горивата, состојбата беше мирна и не предвидовме дека состојбата може и понатаму да се влошува. Ова е резултат на новите корекции што се прават, вели Димитриеска-Кочоска.

Таа рече дека инфлацијата е стабилизирана и дека досегашните мерки спречиле целосно прелевање на повисоките цени на нафтата врз другите производи и услуги.

На расходната страна, вториот ребаланс предвидува намалување од 425,8 на 420,5 милијарди денари. Кратењата се однесуваат на ставки каде што реализацијата е послаба или не станува збор за највисоки приоритети. Најголеми корекции има кај дел од капиталните расходи, субвенциите и стоките и услугите.

— реклама —

Кај капиталните инвестиции се прави корекција од околу 5,7 милијарди денари, главно поради пролонгирање на динамиката на реализација на одредени проекти.

Ова не значи дека откажување од капиталните инвестиции, вели Димитриеска-Кочоска.

И покрај корекциите, средствата продолжуваат да се обезбедуваат за Коридорот 8 и Коридорот 10-Д, патната и железничката инфраструктура, автопатската делница Скопје–Блаце, заедничкиот железнички граничен премин со Србија кај Табановце, како и за водоснабдување, канализација, пречистителни станици, управување со отпад, училишта и спортски сали.

Дополнителни средства се обезбедуваат и за здравството и најранливите категории граѓани. Дел од ослободените средства од ставки со послаба реализација се пренасочуваат кон Министерството за социјална политика.

Буџетскиот дефицит останува 46,3 милијарди денари, односно 4 проценти од БДП. Проекцијата за економскиот раст во 2026 година останува 3,5 проценти, додека инфлацијата се очекува да биде под 3,5 проценти.

Во текот на 2026 година државата треба да сервисира обврски во вкупен износ од 76,6 милијарди денари. Од оваа сума 55,1 милијарда денари се однесуваат на отплата на надворешниот долг, 9,9 милијарди денари на домашниот долг, а 1,6 милијарди денари се одлив по даден заем кон Развојната банка. Дополнително, државата има обврски по основ на едногодишни државни хартии од вредност во износ од околу една милијарда евра.