Министерот за земјоделство, шумарство и водостопанство Борче Серафимовски денеска ги посети селата Дабиље и Пиперово во струмичкиот регион, каде што невремето предизвика значителни штети врз градинарските култури и пластениците.
За време на посетата, министерот заедно со градоначалникот на Општина Струмица, Петар Јанков, ги обиколи оштетените земјоделски површини во Дабиље, додека во Пиперово беше придружуван од градоначалникот на Општина Василево, Славе Андонов. Земјоделците ги информираа за последиците од невремето врз производството и очекуваните приноси.
Серафимовски истакна дека зад секоја оштетена култура стојат голем труд, вложувања и посветеност, поради што, како што рече, институциите имаат обврска внимателно да ги сослушаат земјоделците и да обезбедат реална процена на настанатите штети.
На средбите со претставниците на локалните самоуправи беше договорена координација за спроведување на постапките за евидентирање, процена и надоместување на штетите, со цел процесот да се реализира што е можно побрзо.
Министерот порача дека државата мора да биде вистински партнер на земјоделците, особено во ситуации кога временските непогоди сериозно го загрозуваат нивното производство и егзистенција.
Воедно, тој ги повика земјоделците редовно да ги следат предупредувањата на Управата за хидрометеоролошки работи и информациите објавени на веб-платформата „Агрометео“, кои можат да помогнат во планирањето на земјоделските активности и навременото преземање мерки за заштита од неповолни временски услови.
