(Видео) Серафимовски: Инвестираме 25 милиони евра во „Страиште“ за современо наводнување на 1.500 хектари во валандовскиот регион

Со инвестиција од 25 милиони евра започнува третата фаза од системот за наводнување „Страиште“, со која ќе бидат опфатени 1.500 хектари земјоделско земјиште во валандовскиот регион. Од проектот се очекува да имаат корист околу 6.000 земјоделци.

— реклама —

Почетокот на реализацијата беше означен денеска во населеното место Пирава, во општина Валандово, на настан на кој присуствуваа премиерот Христијан Мицкоски, министерот за земјоделство, шумарство и водостопанство Борче Серафимовски и градоначалникот на Валандово, Ѓоко Камчев.

Проектот предвидува изградба на 70 километри цевководна мрежа под притисок, поставување околу 500 хидранти и изградба на нова пумпна станица. Системот ќе овозможи наводнување капка по капка, попрецизно дозирање и поекономично користење на водата, што треба да придонесе за постабилни приноси и поквалитетно производство, особено во сушните периоди.

— реклама —

Министерот Серафимовски посочи дека, покрај инфраструктурата, проектот опфаќа и советодавна поддршка и практични обуки за земјоделците. Тие ќе добиваат стручни препораки за приспособување на наводнувањето според влажноста и својствата на почвата, временските услови и потребите на земјоделските култури.

— реклама —

Според него, инвестицијата треба да придонесе за посигурно земјоделско производство, подобра заработка за земјоделците и развој на преработката, складирањето и трговијата во валандовскиот регион.

Системот „Страиште“ се надоврзува на првите две фази од проектот „Вардарска долина“ и претставува продолжување на соработката со германската развојна банка КфВ.

— реклама —