(Видео) Серафимовски: Со 9,5 милиони евра ги намалуваме трошоците за нафта на земјоделците – започна распределбата на 48.037 картички за зелена нафта

Започна распределбата на картичките за зелена нафта за земјоделците, при што годинава се опфатени вкупно 48.037 корисници. За мерката се обезбедени 584 милиони денари, односно околу 9,5 милиони евра, информираше министерот за земјоделство, шумарство и водостопанство Борче Серафимовски.

Серафимовски денеска ги додели првите картички во Свети Николе, а потоа им ги врачи картичките и на земјоделците во Битола.

— реклама —

Тој посочи дека финансиската поддршка пристигнува во период кога земјоделците имаат трошоци за есенска подготовка на почвата, набавка на семенски материјал и ѓубрива, како и за одржување на земјоделската механизација.

— реклама —

Мерката се спроведува преку Програмата за финансиска поддршка во земјоделството за 2026 година. Износот за секој корисник се определува според пријавените површини и култури во барањата за директни плаќања за 2025 година.

Поддршката се движи од 3.200 до 12.000 денари по хектар. За пченица, јачмен, пченка, ориз и други култури од оваа група се предвидени 3.200 денари по хектар, додека за сончоглед, маслодајна репка, луцерка и други култури од соодветната категорија – 4.800 денари.

— реклама —

За градинарските култури опфатени со мерката и за лозовите насади следуваат 9.600 денари по хектар. Кај овошните култури, за јаболко, круша, слива, праска и други се предвидени 12.000 денари, додека за дуња, калинка, бадем, лешник и други култури од категоријата – 8.800 денари.

За тутунот поддршката изнесува 11.000 денари, а за оревите и питомите костени 6.000 денари по хектар.