Над 420 денари за килограм: Се очекува повисока просечна откупна цена на тутунот

Просечната откупна цена на тутунот од годинешната реколта се очекува да надмине 420 денари за килограм, најави министерот за земјоделство, шумарство и водостопанство Борче Серафимовски на Форумот за ориентален тутун во Прилеп.

— реклама —

Серафимовски посочи дека Министерството работи на подготовка на откупот, со цел да се обезбедат јасни договорни услови, транспарентна проценка и навремено исполнување на обврските на откупувачите.

— реклама —

Дополнително, тутунарите ќе добиваат субвенции од 80 денари за килограм тутун од прва класа, 70 денари за втора и 60 денари за трета класа. Министерот нагласи дека поддршката ќе се усогласува со пазарните движења, а производителите навреме ќе добиваат информации за побарувачката и условите за откуп.

Тој предупреди и дека високите температури и сушата влијаат врз приносот и квалитетот на тутунот, поради што планирањето на производството ќе се приспособува на климатските промени, со поддршка на научните установи.

— реклама —

Според Серафимовски, тутунопроизводството опфаќа околу 18.000 земјоделски стопанства, а извозот на тутун и тутунски преработки носи годишен девизен прилив од 140 до 150 милиони евра.

Форумот во Прилеп го организираа Меѓународната асоцијација на тутунопроизводители (ITGA) и Сојузот „Мака на тутуноберачите“, а учествуваа производители, претставници на меѓународни организации, научната заедница и откупувачи.