Младинската организација на СДСМ – Социјалдемократска младина на Македонија (СДММ), преку прес-конференција одржана од Кристијан Дојчиновски, упати серија остри обвинувања кон премиерот Христијан Мицкоски.
Во настапот, СДММ директно го доведе во прашање политичкиот интегритет на Мицкоски, поставувајќи го прашањето: „Дали Христијан Мицкоски е новиот Ванчо Михајлов во ВМРО?“.
Од младинската организација тврдат дека Мицкоски прави пресврт во ставовите, особено околу поранешниот премиер Никола Груевски, за кого, како што велат, претходно тврдел дека е жртва на политички прогон, а сега изјавува дека ќе заврши во затвор доколку се врати во земјава.
„Падот на Орбан во Унгарија целосно го измести Мицкоски. Настапува тотална паника“, порача Дојчиновски, алудирајќи на политичките промени по поразот на Виктор Орбан.
СДММ обвинува дека Мицкоски бил „чувар на столчето“ на Груевски и дека активно работел на создавање услови за негово евентуално враќање, вклучително и преку напади врз предметите на поранешното Специјално јавно обвинителство.
Во обраќањето беа поставени и директни дилеми – дали Мицкоски го „предал“ Груевски за да ја задржи власта или станува збор за уште една политичка манипулација.
